عادى !!! مفيش مشاكل ..

إبنى و أخى فى الإسلام

فى رأيى أنا إن اللى خللا المش عادى يبقى عادى هو إننا قلبنا الموازين فى الأسرة
لأن الأسرة هى البزرة
فإن صلحت صلح حال الدنيا
أما إن فسدت ... فربنا يلطف بعباده

لما بأقول الكلام دة بأتهاجم بشراسة , و كل أم و كل أب يقولوا :
" مين قال كدة ؟ .. إحنا فى مجتمعنا الشرقى الأسرة هى الأساس .. و الروابط الأسرية قوية .. أنا شخصيا بحب أولادى و بأعمل ... و أسوى ... "

طيب قول لى بالله عليك :
هل كون الأم تسيب أولادها فى حضانة
أو فى يد خادمة جاهلة ما تربطهاش به أى عاطفة و ليس عليها أى رقيب
أو فى يد دادة فلبينية لها دين غير ديننا و عادات غير عاداتنا
أو فى يد أمها اللى ربت و تعبت و من حقها هى اللى يرعاها و يخفف عنها
أو فى يد حماتها أو خالتها أو عمتها اللى من جيل غير الجيل
أو فى نادى مليان شباب أشكال و ألوان
أو فى البيت وحدهم ممكن يروحوا أو ييجوا أو يجيلهم غريب .....
أو تقفل عليهم و لو حصلت كارثة من بوتاجاز و لا خزان و لا زلزال , لا يعرفوا ينجوا بنفسهم و لا يلحق حد ينجدهم
و كللللللللللللللللللل دة ليه ؟
علشان بتشتغل
هل دة أمر طبيعى و عادى ؟

و لما تسألها :
طيب بتشتغلى ليه يا ست الحبايب ؟
تقولك :
علشان بأحب أولادى و عاوزة أجيب لهم فلوس ( و أبوهم بيعمل إيه ؟ )
علشان بأحب أولادى و عاوزة أجيب لهم كل الكماليات ( و الأساسيات ؟ )
علشان بأحب أولادى و عاوزة أعلمهم تعليم راقى ( و التربية ؟ )
علشان بأحب أولادى و عاوزاهم يبقوا فى أجمل و أشيك مظهر ( و الجوهر ؟ )
علشان بأحب أولادى و عاوزاهم يفخروا بمنصب أمهم ( و أبوهم اللى بيتسموا بإسمه فين ؟ )

و الأب كمان مش معصوم من الخطأ دة
دة هو الأساس فى كل دة :
فى الأول ماراعاش ربنا فى أمهم و قلل من دورها فى بيته و فى وقوفها جنبه و فى رعايتها لأولاده ..
و اعتبرها خدامة ببلاش ..
و لو رماها بعد 20 أو إتجوز عليها , يبقى حقه و شرع الله !!.. و هى اللى غلطانة .
و بعد كدة بقى يدوّر على العروسة اللى بتشتغل علشان تساعده فى مصاريف البيت , و يرجع ينام و يُشخط و يُنطر و يقرا الجرنال أو يتفرج على ماتش .. و هى تطبخ و تنضف و تذاكر للأولاد و تقضى المشاوير .......الخ
و دلوقتى نسى الشروط اللى حطها الرسول لإختيار الزوجة الصالحة .. و نسى قوله صلى الله عليه و سلم ( .. فاظفر بذات الدين .. ) .. و راح يبحث عن ذات المال و ذات الحسب ..
و اللى عنده المال أو الحسب راح يبحث عن ذات الجمال ..
بغض النظر عن الأخلاق و لتربية و الأصل ..
وأصبح يقضى وقته كله بيلهث ورا القرش من الصبح لبعد المغرب .. و ممكن يسافر بالشهور و السنين

و لما تسأله :
طيب ليه يا سى السيد؟
يقولك :
علشان بأحب أولادى و عاوز أءمن لهم مستقبلهم ( هو المستقبل بإيدك إنت ؟ )
علشان بأحب أولادى و عاوزهم ما يشقوش زايى ( و مين يعمر و يبنى ؟ )
علشان مراتى ما تشتغلش و تتفرغ لتربيتهم ( و مين يقوّمهم ؟ )


بعد كل دة بتسأل
ليه عادى إن الأم و الأب بيترموا فى دار مسنين و ييجوا أولادهم كل شهر يرمولهم قرشين و يمشوا ؟

علشان أمهم و أبوهم علموهم إن أهم حاجة فى الدنيا دى هى الفلوس
و كل ما بقى عندك كماليات كل بقيت ماشى صح
و إن الرزق فى إيد الشاطر مش فى إيد ربنا
و إن الشاطر هو اللى يعرف إن الغاية تبرر الوسيلة

علموهم :
إن الحب و الحنان بإغداق الفلوس على اللى تحبه
إنك تجيب ناس يرعوا المسئولين منك بالفلوس
إن الصحبة بتتشرى بالفلوس
و الناس مش هتحبك و لا تحترمك إلا لو معاك فلوس
و الأمان ما يتحققش إلا لو معاك فلوس

علموهم :
إن الحب لا يأكل عيش و لا يعمر بيت
وإن الزوجة الناجحة هى اللى بتعرف ترقص و تجيد فنون الإغراء , لدرجة أن أصبح من أساسيات جهاز العروسة : بدلة رقص !!
وإن الزوج ما يعيبوش إلا جيبه

علموهم :
إن الإسلام هو الكام آية اللى حفظوها فى المدرسة .. و صلاة الجمعة ..
إن صيام رمضان نوم بالنهار و سهر فى الخيّم الرماضانية و الفرجة على المسلسلات بالليل
إن الحج لقب بنتباهى به .. و ياسلام لو كان حج خمس نجوم !!
إنك تاكل أخوك قبل ما ياكلك .. و اللى يضربك إضربه .. و اللى تغلب به إلعب به .. و الدنيا مصالح ..

علموهم :
إن المذاكرة علشان النجاح و بس .. و بعد الإمتحانات ... نفض !!!
إن الصح إنك ما تفتحش بقك لأنك مش هتفهم أكتر من اللى قبلك
إن الغربيين بس هما اللى بيفهموا و هما اللى بيخترعوا و هما اللى بيطوروا .. و إحنا بنتمتع بعصارة أفكارهم و مجهودهم .. بفلوسنا !!
إن من خاف سلم .. و خليك اشى جنب الحيطة
و إنت مالك .. خليك فى حالك .. وعيش حياتك دة الدنيا فانية !!


أقول إيه و لا إيه ؟


أكيد بعد كلللللللللللل دة

لا زم المش عادى يبقى عادى

و لا إيه ؟

اللهم ارحمنا برحمتك يا ارحم الراحمين
جزاكم الله جميعا الخير كله

فعلا اخي ابو مصعب

كل ما يحمل كلمه عاااادي لا يحمل معني حلال في هذا الجيل

واري ان كلمه عادي هي حل لخلافات العوام

كلمة عادي تشعرهم بأنهم يفعلون ما يجب ان يفعل

الله المستعان

جزاك الله خيراُ اخي ابو مصعب ..ورزقك الله

جزاكم الله خيراً على المرور الكريم

جزاكم الله خيراً على المرور الكريم